打針隨想

個傻女真係識聽? 話同佢去打針, 入袋都唔識笑!字

今日終於帶咗豆b去打針喇, 從此可以大搖大擺行街街, 安樂晒!
今日出去嘅時候都好熱, 我都做足預防準備, 放咗雪種落袋, 又坐住佢媽媽架冷氣車, 打完針又餵水, 都算無驚無險咁將任務完成!

同豆b媽媽傾起最近呢單松松打針事件, 佢都有D懷疑, 中暑會唔會條脷黑成咁? 好多網上討論, 都話係似中毒多過似中暑, 我都唔敢評論, 但睇到報導話係由姑娘打針嘅, 咁有無問題?

我養咗狗狗咁多年, 每次都係由醫生親自打針嘅, 唔係話姑娘唔可以打針, 根本好多人類嘅醫務所, 好多都係由姑娘負責呢部份; 問題係姑娘有無受過呢個訓練, 佢有無核對清楚係乜嘢疫苖,劑量有無拿捏準確等等?
我每次同狗狗打針, 都見我狗狗嘅醫生再三核對, 仲會比埋我睇係乜嘢藥, 又指比我睇個expiry date!

以前我工作嘅時候, 打針呢個步驟, 醫生係從不假手於人嘅, 一來對病人要負責任, 二來出咗事, 佢係要擔上責任嗰個人!


都係要好好咁搵一個好醫生喇, 一定要有愛心, 會為動物設想, 願意同主人商討; 當然醫生係有專業學問, 但如果一意孤行, 問多句都唔開心,  咁就覺得你係挑戰佢嘅專業, 咁都唔算係一個好醫生!

我哋視狗狗如兒女嘅, 梗係想知多D, 要聽專業意見, 睇吓治療上有幾多option去揀, 然後有所選擇, 點去治療!
願意同主人商量, 去搵一個最好方案, 同時會為動物著想, 去做最適當治療, 咁先係一個值得將寶貝交托嘅好醫生!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！