有朋友同我講, 幾忙都一定會睇我個blog, 唔係睇我文章內容, 而係要睇3隻豬嘅相, 佢話咁好似毎日都有同佢哋見面, 都知道佢哋嘅近況! 真係好開心朋友咁愛錫我D豬仔, 咁就等我keep住報告佢哋嘅日常生活, 繼續同佢哋影相啦!
都好多日無同佢哋出街喇, 天氣一直都唔好, 日日都有落雨, 等到停咗雨又好熱, 咁就躭擱落嚟; 見琴晚天色都唔太壞, 就推車仔帶佢哋落去遊一轉街啦, 咁夜唔比佢哋行行喇, 就等佢哋望下街街啦!
其實夜間出動真係麻麻, 除咗無咁熱之外, 好驚踏到地雷都唔察覺, 因為有好多不負責任嘅狗主, 任由佢哋狗狗通處便便, 事後又唔做善後工作, 攪到D地方咁唔清潔, 真係好唔啱, 所以夜間睇得唔清楚, 真係唔敢比佢哋落地行!
以前日間出動, 一定見到路上有好多乾咗嘅便便, 可能夜間D人放狗, 諗住黑嗎嗎無人睇到, 就唔去執番; 每當我見到D清潔工人, 喺街度掃呢D便便, 而我咁啱帶住我班豬仔經過, 我都會覺得唔好意思, 真係為佢哋覺得羞恥啊, 亦好無奈因為呢一小撮不負責任嘅狗主, 累我哋比其他人戴住有色眼鏡標籤:(
仲有就係遛狗又唔拖帶(一講到呢樣, 我就份外肉緊, 哈哈!),任憑狗狗亂衝亂撞, 都好似理所當然; 我自己養住狗狗都覺得佢哋呢種行為非常討厭, 真係有人與生俱來好驚狗狗架, 我自己以前都係, 最衰仲要見到人哋驚仲覺得你係大驚小怪, 嗤之以鼻, 嗰種態度真係好得人憎; 難怪人哋咁唔鍾意養狗嘅人啦!
仲講乜嘢為狗狗爭取權益, 根夲人哋睇見咁情形都怕喇, 點會唔反對吖!
請做番一個自律嘅狗主啦, 如果想狗狗將來有多D空間去玩, 請先做好自己本份, 唔想因為你哋嘅自私而連累其他狗主呀, 我唔想睇人哋厭惡嘅眼光望向我D寶貝, 更唔想被視作養狗嘅都係一D自私嘅人!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
