身壯力健

開住冷氣比佢哋歎世界

近日聽聞好多單狗狗中暑嘅案例, 令我好憂心! 落雨固然係無得出門, 等到好天又咁熱, 望向窗外紅紅嘅太陽高高掛起, 真係無勇氣踏出家門, 都係要等到食完晚飯, 同佢哋坐住車仔出去兜一round啦!

唔通真係全球暖化問題, 往年真係唔覺得咁熱, 都係選擇留喺屋企, 開大冷氣等佢哋涼吓先; 如果帶佢哋出門萬一真係發生唔想發生嘅事件, 我諗我真係接受唔到, 一定會發癲......

環顧番幾隻豬仔嘅近況, 波波食完晒醫生開嘅藥, 有95%好番, 不過偶然都聽到佢會咳一吓, 我唔想再比佢食咁多藥喇, 一聲半聲應該好快會好番啦!

早兩日比隻豬豆嚇親, 佢嗰種尖叫真係好可怕, 叫到我個心好慌亂, 好彩得醫生同朋友解答, 先順利過咗關!  

佢經過咗兩日嘅不適已經適應到毛毛剪短, 一切習慣都番到從前一樣喇; 養狗咁多年我都係第一次遇到咁嘅事件, 唔止話書到用時方恨少, 學無止境真係無講錯, 每件事都會累積到寶貴嘅經驗! 

達達豬就無乜特別issue, 但毛毛一樣係無進展, 我感覺佢嘅毛毛仲越嚟越單薄, 喺太陽底下好似著咗透視裝, 整個輪廓都一目了然; 無奈任我做過幾多樣嘗試, 但配合唔到, 做幾多都係枉然!
鱉蛋粉嘅sample已經試過, 達達都無出不良反應, 我都落咗order喇, 冀望呢隻會幫到少少啦!

過去數週一家健康都有小問題纏擾, 依家一切都已經過去; 唔期望咩嘢財緣廣進, 橫財就手(老公每星期進貢馬會都係咁話 :p) 祇祈望大小平安, 身壯力健,  就於願足矣!!

兩隻豬瞓得好舒服

豆b雖然都想上床, 但明顯佢唔太習慣喺度瞓覺

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！