肝酵素超標

無風無浪咁湊左波波三個月, 呢段期間係狗狗最可愛既ＢＢ期, 佢古靈精怪, 多多表情, 只要同佢一齊, 我地就好開心喇！　

一轉眼佢六個月大喇! 呢個時候係松松換毛期間, 最醜樣嘅時候! 不過, 我覺得波波甩毛情況係特別誇張!

某個晚上, 佢有D肚痾, 仲見到便便有少少血絲, 本來養過咁多隻狗狗, 呢Ｄ唔算特殊情況, 正常嚟講應該唔駛咁擔心嘅, 不過佢仲細, 我就唔敢等, 第一時間同佢去睇醫生!

就係呢個甩毛嘅樣, 醫生一見就認定佢有重病

點知醫生見到波波, 就認定佢問題嚴重, 因為波波果時得0.8KG, 細細粒又換緊毛,  佢話佢唔係未見過松松換毛, 但唔會係咁!

比佢一嚇, 我真係好驚, 咁之後要做乜嘢檢查都唔敢反對, 醫生要同佢驗大, 小便, 驗血, 仲要同步照X-ray!!  喺等候報告期間, 心情極度低落, 心諗, 點解? 點解唔可以比我喘息一下呢? 放低叻叻都未有一年, 又要面對我最怕面對嘅狀況!!!!

終於報告出咗嚟喇, 睛天霹靂, 佢真係有事! 佢嘅肝酵素超標竟達6-8倍, 而最痛心係聽到醫生嘅解釋!
 

就係呢份報告嚇到我方寸大亂

醫生嘅解釋我好難演繹出黎, 佢大意係話狗狗咁細, 無可能接觸到Ｄ乜嘢會咁大傷害, 一定係先天性嘅問題!

佢話呢個情形係佢肝嘅血管有事, 分流咗去唔適當嘅地方, 要做一個手術, 開肚搵下邊條血管有問題, 然後紮住佢, 可能唔係一條血管問題,可能多條有事!  呢個係一個大手術, 佢唔會做, 要請佢師傅做! 不過波波1kg都無, 就難挨到呢個手術喇!
咁即係 "波波會死???" 佢話食藥睇下點先啦!

我嘅寶貝，你千萬唔可以有事呀！

我都唔知自己係點番到屋企, 腦中一片空白, 好彩老公有一齊去診所!!
跟住, 拎埋份報告, 落去寵物店, 想同阿Y商量下, 到底要點做好! 今次落到去, 見到阿C, 佢話阿Y放咗工喇!
我拎份報告出嚟, 叫佢比D意見, 佢話breeder嘅狗狗從未有過呢D問題, 叫我先唔好太擔心, 佢明日陪我一齊, 再去睇多個醫生, 攞個second opinion再作打算！

果一晚，係漫長嘅一晚, 亦係心碎嘅一晚！
雖然波波只係同我哋一齊短短幾個月, 但我哋已經無可能接受到, 如果要失去佢！！


 多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！