又出事喇!

可憐嘅波波豬, 終日被困圍欄內; 畢竟佢呢個係貪玩嘅年紀, 但佢都只可以自己同自己玩! 

即使我買幾多玩具, 即使我有幾錫佢, 圍欄內嘅波波, 都係好孤獨! 尤其係見到其他狗狗可以自由自在, 無須困住, 可以想像到佢有幾唔開心!

日子耐左, 確定安安唔會兇佢, 我會放安安入去欄內, 安安都會盡可能陪佢玩吓; 但佢能力有限, 畢竟已進入老年, 無可能好似波波咁, 有如開動咗嘅摩打而唔駛停落嚟! 

於是, 我再嘗試放波波出嚟, 等佢跑吓, 反正安安同精精都接受咗有呢個細佬, 希望樂樂唔好太抗拒啦!

 

 

果日我哋一不留神, 波波出事喇!
佢可能太開心喇, 竟然去撩樂樂同佢玩, 點知惹嬲咗樂樂, 被樂樂追打, 佢大驚之下回頭狂跑, 不留神猛力撞向檯腳, 佢大叫咗一聲!

我真係好驚, 因為佢嘅反應好唔妥, 竟不受控制咁流口水, 整個胸口都濕晒喇! 我同阿女立刻飛的士同佢急診, 醫生話佢瞳孔反應好差, 有腦震盪! 要入院觀察, 留院照腦!

住左幾日醫院, 又吊水, 入氧氣箱....最後照埋個腦, 可以出院喇! 不過醫生叫我都要小心觀察住佢, 連吊鹽水枝針頭都唔敢拔出嚟住, 以防佢再有反覆情況出現, 可以立刻急救!

呢個仔, 當時只係得十個月大, 受過幾多苦? 真係心痛死我!

出咗院都要插住個針頭喺手, 陰功豬仔!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！