重情嘅樂樂 (樂樂篇)

樂樂係個開心果, 比個玩具佢就可以玩一整天

樂樂係一隻開心嘅小狗, 比個波仔佢就自己都可以玩上一整日, 見到佢追住個波, 跑呀跑, 一身披毛飛起晒, 就覺得賞心悅目~~

1996年從breeder處帶佢番嚟不足一星期, 有一日佢突然猛嘔, 我就帶咗佢去跑馬地睇醫生; 我從無諗過佢會咁嚴重, 點知醫生掀開佢個口, 叫我睇吓佢全無血色嘅牙肉, 話佢係長期嚴重營養不良, 要住院吊鹽水, 再加每日打針保命! 
真係攞命, 做乜咁多事㗎?

養bebe果時都無咁多事嘅, 一隻安安番嚟要住院, 依家樂樂又係一樣, 佢哋就係要我唔得"安安樂樂"啦!

無法啦, 點都要醫好佢嘛, 住院就住院啦! 佢整整住咗一個星期先番屋企!

睇住4隻小鬼無病無痛, 開開心心, 有時玩到糖黐豆, 有時又會嗌吓交, 真係好得意!

樂樂雖然年紀最細, 但就最氣焰囂張! 不過佢明顯同叻叻最friend, 從來唔會鬧叻叻, 仲會幫叻叻兇番人!

年紀最細, 但最有大家姐丰範, 幾隻野都怕晒佢

但佢從來唔會蝦叻叻, 名乎其實係叻叻身邊嘅女人

無風無浪,  開開心心咁過咗好幾年, 就發覺佢有乳腺瘤, 即刻仲做埋手術, 都無特別壞嘅狀況, 而且佢術後康復極快!

但直到叻叻病重, 直到叻叻離世!!! 

喺樂樂身上竟然發生咗重大嘅改變, 佢整日都收埋自己喺門後面, 叫佢出嚟或想抱佢出嚟, 佢都會失晒控制張口咬落嚟!
動物有情, 失去咗佢嘅伴侶, 樂樂竟然咁傷心!  
我哋諗, 過一段期間佢應該無事吧!

經過我哋嘅努力, 一段日子之後, 佢終於肯喺門後走出嚟 , 我哋以為佢已經將苦痛淡忘; 但原來....喺我哋失去叻叻嘅同時, 我哋都失去咗我哋嘅開心果 - 樂樂!

佢變得暴燥, 陰陽怪氣, 無一日過得開心, 以前嘅樂樂, 已經跟隨叻叻一齊離去!

佢自己封閉咗喺自己嘅世界裏面, 任何人, 狗接近都會引起佢發狂!

所以後期帶咗波波番嚟, 隻豬仔無有識死去撩佢玩, 比佢一兇之下嚇到往後退, 撞咗落檯腳做成腦震盪, 要留院治理啦!

幾年間樂樂改變好多, 無論精神, 肉體佢都飽受煎熬! 由佢快快樂樂咁追波玩, 到後期企喺度都有困難, 足以叫佢無'狗'生樂趣! 一隻狗狗最開心嘅都係可以自由咁跑, 但係佢再無呢個能力!

最初發覺佢有問題, 以為佢手腳關節有事, 醫生建議佢打一個療程嘅骨針, 再加葡萄糖氨, 睇吓有無幫助. 但療程完後, 未見好轉, 再照x ray先發覺佢應該係脊椎出問題, 食類固醇無效, 亦唔建議佢做手術喇! 
一來佢年事已高, 二來呢個係一個有危險性嘅手術, 係會有機會全身癱瘓; 醫生話佢唔會即時惡化, 佢唔係急性, 係慢性神經退化問題; 佢會喺一, 兩年間慢慢咁差! 醫生認為無需要去博, 因為佢可能都活唔到最壞果個時期啦!

於是, 近一年間我睇住樂樂前肢慢慢惡化, 除咗飲水佢會奮力企起身, 其他時間, 佢都唔會再企高喇!

去年佢15歲生日, 佢會有佢嘅16歲嗎?

除咗飲水佢會企一陣間

大部份時間都係躺下

前年精精走後, 同佢一齊番嚟嘅同伴只剩低佢一個, 我都有擔心佢情緒有改變, 但係今次佢已經莫不關心! 舊年安安走埋, 同佢同期嘅狗狗只留低佢咋!

佢已介高齡, 活動能力大減, 加上又行動不便, 近幾個月佢嘅生活就係食同瞓, 一整日一動不動!! 
除咗有時發脾氣吠幾聲, 同便便時爬去廁所外, 根本好似一隻活標本!!
(真係要讚呢隻女女, 佢好守規矩, 即使佢行唔到, 爬都爬入廁所便便, 仲會企高後腳等唔好整濕自己個身)

但生命有時真係好諷刺, 即使佢咁大年紀, 但佢嘅血檢報告竟然唔係太差, 雖然唔可以同壯年時侯相比, 但除咗需要食一種保肝藥之外, 一切尚算良好, 咁即係要佢捱落去啦!

樂樂係唯一嘅一隻狗狗, 我希望佢可以早日得到解脫, 但要我幫佢安樂我又做唔到; 從佢身上, 我深深體會到生命不在乎長短, 只要活得充實, 開心就好! 
我祇希望佢可以平靜安穩咁過埋餘下嘅日子, 當嗰日要嚟, 就唔會再有痛苦喇!!



多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！