 |
| 9個月大嘅安安 相片連結 |
縱使佢已年老, 常有肚疴嘅問題, 但我從無將死亡聯想到佢身上, 除咗幾年前發覺佢頸椎嘅第三節骨壓住神經線, 算係出生嗰場大病後, 最嚴重嘅一次, 一向健康算是良好!.
雖然近年佢行動比較遲緩, 但佢仍有動力去啃骨骨, 與同伴追逐遊戲! 對一隻年近15歲嘅狗狗, 算係唔錯喇, 點都諗唔到剎那間佢情況會變得咁快, 健康急轉直下!
佢走嘅幾日前, 開始胃口轉差, 但我蒸雞肉比佢, 佢都肯食少少, 我諗老狗可能胃口有改變, 咁就每日都煮唔同嘅嘢比佢, 佢都有食, 直到嗰日, 佢乜都唔肯再食, 我開始擔心喇！
我開稀咗保曠力比佢飲, 希望幫佢補充體力, 但係到咗晚上, 佢情況突然變得惡劣, 陷入昏睡狀態, 經驗話比我知, 佢要走喇!
佢好平靜, 無尖叫, 無面容扭曲等等叫我手足無措, 佢只係靜靜咁瞓喺度, 甚至無呼吸急促!
我坐喺佢身邊, 捉住佢雙手, 掃住佢嘅背脊; 佢已經係瀰流狀態, 但佢一直唔肯嚥下最後一口氣!
我同佢講, 媽媽今次幫唔到佢喇, 攰就唔好頂落去, 唔好再堅持; 唔好唔捨得媽媽, 媽媽會陪住佢, 唔使驚, 佢只係行先一步,總有一日, 我哋會再重聚!
從我撫摸住佢嘅手, 我感覺佢嘅身體放鬆咗, 跟住佢離開咗我哋!!
好多謝親愛嘅安安, 佢好錫媽媽, 無叫媽媽做一D難於選擇嘅決定, 佢選擇咗佢自己要走嘅路, 平靜, 安詳咁離開!!
朋友們都講, 安安咁離開係佢修番嚟嘅福份, 無經過一番折騰! 無好大嘅痛苦!
的確, 比起叻叻, 佢同精精可以講係"壽終正寢", 自然咁行到油盡燈枯!
的確, 比起叻叻, 佢同精精可以講係"壽終正寢", 自然咁行到油盡燈枯!
 |
| 睇起嚟仲精精神神嘅安安, 點諗到兩個月後就離開左我! |
安安係我從bb就開始養嘅狗狗, 15年裏面,累積咗無數經歷同好多好多值得回味嘅生活點滴, 佢嘅離開,我有搥心嘅痛, 但呢個係生命必經嘅過程, 再傷心都係要接受 :'(
 |
| Love you forever, On On!! |
 |
| 2012年５月為紀念安安做嘅羊毛氈狗狗！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
