被孤立嘅波波

因為波波個肝出事, 翌日同老公, 阿C一齊去見第二個醫生! 

呢位醫生認為肝門脈分流嘅情形唔常見, 問我日常點照顧佢, 我都係正常咁比乾糧佢食, 咁細個邊敢食其他嘢呢, 零食都無比過! 仲有就係會開稀'滴露'抹籠, 同每月用滴頸藥防心絲虫!

佢聽落都唔覺有問題, 但都建議先將所有嘢停晒, 睇睇會唔會有好轉! 暫時唔用藥, 先改食肝臟處方糧, 一星期再驗血! 如是者我又要再走呢條岐嶇嘅驗血之路!

每星期帶住隻豬仔去抽血, 心真係好痛, 佢咁細個就要受呢D苦, 不過開心嘅係, 佢每星期驗血報告都有好轉, 一個月後, 停食肝臟糧, 再一個月後, 佢肝酵素回復正常! 呢段期間, 佢係無食過一粒藥既!

醫生覺得會係外來因素,  傷害過佢個肝, 依家無再接觸, 所以無事! 但係佢個肝受過傷害, 要做追蹤治療, 每三個月都要同佢驗血!

波波喺驗血中慢慢長大, 佢七個月大時, 我買左個圍欄, 等佢有多D活動空間, 亦開始試下比佢同三隻狗狗接觸, 我總唔可以將佢地一世隔開嘛!
呢個係我嘅疏忽, 因為無仔細諗過波波同家裏嘅狗狗有一個好大嘅代溝, 佢哋年紀相隔咗整整十年多! 安安, 精精根本再無興趣玩耍, 而樂樂仲會鬧佢, 攪到波波根本唔敢行近佢地! 

勉強佢地和睦相處係無可能, 唯有自己錫多D波波啦!
佢密密咁要去抽血, 已經夠可憐喇!

三隻狗狗無視波波嘅存在, 佢好孤立!

見到隻豬仔無奈嘅表情, 有D心痛!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！