家有4寶

請人為四隻寶貝做嘅十字繡

緣份真係好奇怪, 原本想為安安搵個伴, 但喺無心插柳嘅情況下, 喺1996年我竟然帶咗三隻松松返屋企!

嗰日,  由一間寵物店引見, 約好breeder去睇一隻剛出世嘅松B, 上到去佢屋企, 見到兩隻十分可愛, 好細身嘅狗狗, 我接觸嘅狗狗唔多, 大都係在街上, 寵物店所見, 但就從來無見過D咁細, 咁靚, 咁可愛嘅成犬.

Breeder話佢就要移民喇, 所留低嘅狗狗都係要賣, 呢幾隻都會出讓!
我一直都想自己由BB開始將狗狗湊大, 所以無諗過會買佢哋, 睇完BB就落訂, 因為BB太細, 要過多一個月先可以帶佢番屋企!

breeder兩夫婦好好人, 我同女女就留喺度同狗狗玩咗一陣.  其中一隻真係超可愛, 跳跳蹦蹦活潑非常,  另一隻又超嗲, 成日自己爬上女女度要抱抱, 玩咗一陣, 我個心已經開始動搖, 心想唔一定要BB嗟, 佢哋細細隻又話未滿一歲, 都算係一隻長大嘅BB啦.

我就同女女商量, 不如唔要隻B啦, 我想要最活潑嗰隻, 點知阿女話佢鍾意成日黐住佢嗰隻喎, 咁點好呢?
真係難於取捨!!!喺我哋商量其間, breeder竟然話如果想要, 就要一併買晒佢餘下嘅三隻狗狗!

呢三隻就係叻叻, 樂樂同精精喇!

天呀! 三隻? 唔好話要付出一定數額嘅金錢,(因為呢D係賽級嘅狗狗, 當然我係唔識分辨咁多, 淨係知佢地細細隻又靚, 喺一般寵物店未見過!) 要一下子照顧咁多隻狗狗真係難以想像!

而且我哋一直都只係同兩隻玩, 何來第三隻?  



breeder一指, 原來檯底下瑟縮住一隻黑黑嘅狗狗, 毛剃得短短好醜樣喎; 佢 因為剛生產完, 而不幸狗b夭折! 
睇見佢係好可憐, 但佢咁嘅樣仲要比錢去買佢, 心裏面梗係唔想啦! 所以都係作罷打道回家算喇!!

點知番屋企後竟然成晚都掛住嗰兩隻小寶貝, 同老公商量後, 三隻就三隻啦, 都係決定帶晒佢哋番嚟!

翌日一行三人, 每人手抱一隻狗狗, 懷住複雜嘅情緒, 既驚又喜, 浩浩盪盪歸家去!
就係咁, 我哋屋企頓時成為一家七口嘅大家庭喇! 除咗我, 老公同阿女外, 依家仲有兩仔兩女, 分別係安安,樂樂, 精精, 叻叻~~

唔知係轉咗新環境, 還是樂樂根本身體弱, 佢竟然病到要住院; 精精生產後又無加調理, 身體好差, 而且佢極度欠缺安全感, 係有情緒病;  一開始真係未能消化, 頭都大埋!

還好經過大概半年細心嘅照顧, 三隻寶貝加埋安安, 喺我屋企都得以健康成長喇!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！