精精係一隻極其神經質嘅狗狗, 喺最初帶佢返屋企果一個月裏面, 佢成日就係匿藏係檯底下, 我哋一靠近佢就喺度狂吠, 好彩當時住嘅地方係準養狗, 亦無依家果D如果有兩戶投訴就要搬走狗狗嘅條文, 唔係真係比佢玩死!
當時佢真係唔得我歡心, 一來佢唔係我想要嘅狗狗, 只係無奈地要一併買下, 再者當時剃晒毛嘅佢又醜樣, 仲要神經質一日到晚吠,吠, 吠!!! 我成日都諗如果有人要就送走佢~~
嗰日, 我帶咗佢哋幾隻小鬼到旺角勝利道一間寵物店沖涼, 喺我在店裏等候其間, 在同老板閒聊間又提起呢個問題, 點知老板話如果我出讓精精佢要, 佢話精精嘅骨架好靚, 係一隻靚狗! 當時我真係有D意外, 乜精精係靚狗嚟咩? 靚都無用啦, 神經質成日吠!! 我話要同老公商量, 咁沖完涼就帶佢哋番屋企.
晚上同老公講起, 點知佢嘅反應係同我講咗一句"你講真架? 黐咗線咩!" 女女就抱住精精同我講, 果D狗鋪要咗精精會將佢當做生仔機器, 一路生到佢死, 叫我千萬唔好咁做. 我真係無諗過呢個問題, 咁嘅生活實在太可悲喇!
我望住精精同佢講, 媽媽會從新學習點去開導你, 唔該你都學吓去配合, 唔好淨係識吠, 吠, 吠!!!
嗰日之後, 我好認真咁去諗精精嘅身世, 其實佢真係好可憐, 佢喺breeder度都係用嚟生仔, 仲要生產後BB夭折, 佢未傷心完就被送走去一個陌生嘅地方, 我亦無好好咁去愛佢, 除咗比佢溫飽, 我自問都係偏心喺其他幾隻身上.
如果調轉我係佢, 我都會發神經啦! 諗吓諗吓頓時對精精產生咗一份憐愛, 嗰種愛係同其他有所唔同, 我好清楚當時我係覺得佢可憐, 所以希望佢往後可以過D好日子!
 |
| 2009年10月去左彩虹橋嘅精精 |
喺精精八歲嗰年發覺佢有奶水流出, 佢無交配過都唔知發生乜事, 帶佢去獸醫度話佢係假懷孕, 如果唔打算生養要同佢做絕育, 仲發覺佢有3個乳腺瘤,要一併切割!
之後再send去化驗確認係良性還是惡性!
真係無諗過狗狗都有D咁嘅病, 當時經驗不足, 除咗擔心, 都係擔心!!! 擔心之餘, 就諗樂樂會唔會有事, 因為所謂乳腺瘤, 細到好似芝麻, 我真係check唔到, 都係帶樂樂去獸醫度check吓安全D~~
點知一check之下, 樂樂都有一個乳腺瘤, 獸醫建議一併切割同絕育. 由於怕一下子要照顧兩隻手術後嘅狗狗有困難, 咁決定先做精精, 稍後再做樂樂.
精精手術當日, 我發覺原來不知不覺間, 呢幾年裏面我對佢有咗好深嘅感情, 果日嘅擔心真係同親人做手術無唔同, 送咗佢去醫院番屋企行唔安坐唔落, 一直憂心咁等住快D到下午去接佢 , 又怕突然接到醫院嘅call話精精出事, 一整日好似游魂咁, 直到接番佢!
當獸醫抱住精精showed比我睇佢個傷口, 真係好心痛, 佢左面中間都有兩條長長嘅傷口, 獸醫話幸好手術及時, 因為佢子宮都開始蓄膿喇~~
經過呢次之後, 我覺得自己太大意, 所以決定同佢哋年年驗身. 一年之後, 同佢哋做body check, 發覺精精心臟有事, 尤幸發覺得早, 所以要開始食藥喇, 喺藥物治療下, 就咁又過咗幾年!
2009年精精走喇, 佢喺我地屋企一直活到近15歲！ 佢好乖, 無比過太大麻煩我, 雖然喺最後嗰段日子, 佢小便常失禁, 攪到成個肚仔濕晒, 要常為佢清潔, 但我無過怨言, 我答應過要好好照顧佢哋終老!
走嗰日真係好突然, 之前佢都仲有胃口食嘢, 同平時無分別~~
走前一日胃口就差咗, 但我一啖啖餵佢, 佢都食咗少少,點知一早起身就發覺佢無咗呼吸.
雖然近年佢都係食飽就瞓, 已經唔再活躍!
雖然呢幾年佢心臟唔好, 一路都要食住心臟藥!
雖然我一直都有心理準備, 呢一日始終會來!
但係要面對佢從此就離開我, 今後我再唔可以見到佢, 我仍然係好難過….
 |
| 踏入老年, 12歲嘅精精 |
喺呢十幾年間, 精精有好多改變, 由成日吠變得異常安靜, 安靜到有時會令我忘記咗縮埋喺角落嘅佢!
佢係知道本來佢不被寵愛, 所以認命? 還是感恩, 要配合媽媽, 因為媽媽唔鍾意佢吠?
即使佢要走嗰日, 佢都係在零晨時份, 各人仍在夢中, 悄然離去!!
再三回想, 我對佢係有所虧欠, 係愛得不夠!
即使喺佢走嘅時侯我都無陪住佢, 佢係孤身上路!
呢個係我無法填補嘅遺憾, 希望精精唔會怪我, 喺彩虹橋開始佢愉快嘅新生活, 今生有不足嘅, 往後都能夠擁有!
 |
| 2012年4月, 親手做咗紀念精精嘅羊毛氈公仔! |
