孤身上路! (精精篇)

2009年10月, 波波達達生日會一個月之後,  精精喺零晨時份離開咗我哋! 
我諗狗狗們早已經知道精精將要離開, 佢哋嗰幾日都多咗過去探望精精; 只係我哋, 已經習慣咗佢除咗食嘢, 就郁都唔郁咁瞓喺度, 無留心佢已經行到生命嘅尾聲!

佢走前一日, 屋企特別安靜, 心裏面都有D怪怪嘅感覺, 加上精精要我一口口咁餵食, 呢D係從來未有過嘅情形; 精精從來唔係一隻被驕縱嘅小狗, 心裏面都隱隱覺得有唔妥, 但即使我知道佢將要離開, 我又可以再為佢做D乜嘢呢?  
我心裏面諗起bebe, 醫生話過年老器官衰竭, 係無嘢幫到喇, 只可以盡可能減低佢嘅辛苦, 但望向精精, 佢只係平靜咁如常瞓覺!

嗰一晚, 我個心就係好不安, 同老公半夜都多次起身, 去睇吓佢有無異狀, 佢都喺沉睡狀態; 點知一覺醒來, 佢已經離開!

望住精精仍然柔軟嘅身體, 眼淚簇簇掉落, 一個鐘前仲有呼吸嘅精精, 一切都靜止咗!

精精, 對唔住啊! 媽媽無陪喺你身邊, 你有怕嗎?  

雖然最初曾經有過想將你送走嘅念頭, 但十三年來你一直默默陪住我, 我亦有承諾唔會再比你離開; 今日往後, 你都會喺呢個家, 永遠與我哋同在!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！