毛量每況愈下 (w/album)

一直以為只要及時去幫達達, 佢會好快好轉! 佢食藥後三個星期, 甲狀腺素已回復正常, 但佢嘅披毛完全無改善, 佢並唔係大量掉毛, 只係新陳代謝非常慢, 掉失嘅無再更新; 身上嘅黑色素沉著亦無預期好轉嘅效果!

我開始上網搵資料, 睇下有無補吸品對佢個病有幫助!

網上睇到台灣有一隻柴犬, 都係甲低, 食咗隻名為"愛倍多"嘅補充品, 效果好好, 咁我問獸醫可唔可以比達達試下! 

Hsiang醫生真係好好人, 佢唔似一般獸醫, 總係答"唔好試, 唔知呢D乜嘢嚟!" 當我問佢嘅時候, 佢喺我面前立刻上網,  佢要先作瞭解. 由於見到製作嚴謹, 都有送國外驗証, 係頗安全嘅,

所比達達一試無防; 呢D唔係藥物, 係一D菇類提取物, 內有靈芝, 雲芝, 舞茸, 巴西蘑菇.......等
由於香港未有出售, 我就托台灣代售果D公司幫我訂番嚟, 一路食到現在.(不過, 最近佢哋公司內部有問題, 已經停產!)

日子如常咁過, 我抽多咗時間帶佢哋到處去逛, 我希望同達達出去多D, 佢會開心D! 有朋友提到達達可能唔開心, 情緒都會影嚮佢內分泌, 我都覺得達達係情緒有D問題, 佢最近時常縮埋喺角落, 如果伸手抱佢, 佢又好似當年做絕育手術後咁尖叫, 但到底係乜嘢原因我又唔知!
 

為咗達達我時常失眠, 總係擔心佢會好似叻叻咁, 朋友, 家人都勸我要放寬心情!
好快到咗萬聖節, 屋企人鼓勵我為班豬仔再影相; 無錯, 最近情緒拉得太緊喇, 總要搵D嘢比自己放鬆下, 開心下, 當係叉下電啦! 於是, 將擔心放埋一邊, 同佢哋影咗幾輯相!

如果養開狗狗嘅, 都會睇到達達個面仔明顯尖咗喇!

相片連結

每日睇住達達毛毛越嚟越薄, 又見佢好唔開心, 都唔知點算好! 朋友建議我請教寵物傳心師, 睇下到底達達有乜嘢心結! 老實講, 我對呢D真係無乜認識, 但當你無晒方向, 都姑且一試吧!   另外, 我在網上亦學習寵物按摩,  每日早晚都同達達做兩次, 希望佢情緒得以改善, 對佢個病有所幫助! 
 
我仲可以做D乜呢? 有時真係好洩氣, 雖然話佢有毛無毛都係我嘅豬女, 但有邊一個媽媽會眼睜睜睇住佢病情每況愈下, 而無動於中?
或者我係比較過火, 但無人經歷過我湊叻叻嗰段日子, 嗰D如過山車咁起伏嘅心情, 係唔會明白嘅!



多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！