以前養嘅幾隻狗狗, 都好少去街, 除咗出去沖涼剪毛, 就係見醫生; 果時我都唔識狗狗係要出去見吓世面, 自己又無做吓功課!
聽見人哋話小型狗唔駛一定出街嘅,係屋企夠運動量喇,
依家先知道咁係唔得嘅, 佢哋都需要接觸出面嘅世界, 要見吓其他人和事, 咁先會有一個健康嘅心態! 養狗狗唔係餵飽佢就算, 係要照顧到佢嘅身同心架!
不過後期佢哋都唔願出去喇, 可能唔習慣, 可能會聯想到出去都係見醫生, 同佢哋出街, 佢哋好似受罪咁, 尤期兩隻女, 一話出街就匿埋, 驚到喺度震!
長久以來嘅習慣都好難改變, 自己懶都係其中一個藉口吧, 放工返到去有時都好累喇, 既然佢哋咁抗拒, 就順其自然吧, 我都樂得清閒一點!
因為接觸多咗養狗狗嘅朋友, 對養狗狗有咗新嘅慨念,
我唔想再好似以前咁, 整日困住波波喺屋企!
不過波波係不設防嘅, 即係我無同佢用任何防虫, 防虱, 防蜱等嘅嘢, 我好怕果d嘢會再傷害波波個肝! 怕一旦吸收到果d毒素, 佢個肝排毒有困難; 所以即使我同佢出去, 我都會抱住佢, 唔會比佢落地行! 我嘅目的只係比佢見吓其他人, 聽下D車聲, 修路聲......
因為波波嘅關係, 而我屋企又就近寵物店, 我多咗落去! 好多時遇到有唔明嘅問題, 會請教佢哋, 同佢哋亦漸漸熟絡!
08年有日落到去, 同阿Y閒聊間, 講起波波同屋企幾隻狗狗嘅情況, 波波唔係好合適出去同一大班狗狗一齊玩, 佢喺屋企又好悶!
點知佢突然指向佢嘅一隻狗狗, 叫我帶佢番去陪吓波波! 比佢喺我處小住渡假, 果時我真係好猶豫!
但阿Y話帶佢番去, 波波開心, 小狗都開心, 等佢哋一齊玩吓啦! 佢話信得過我會好小心睇住狗狗, 唔會有事啦!
咁自私D諗吓, 揍狗狗番去同波波玩, 總好過喺店裏困籠吧, 如果會令波波開心,令狗狗開心, 豈不兩全其美, 何樂而不為呢!
就係咁, 我一手抱住波波, 一手抱住個朋友仔, 快步回家去!
 |
| 呢個就係波波嘅朋友仔喇 |
 |
| 我將佢安置喺圍欄內同波波一齊 |
 |
| 睇佢哋兩個幾開心, 笑容滿面! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
