三豬美容篇

剪完毛想好好地影張相都唔得, 總係唔合作!

今日大概午飯後嘅時間,  C哥哥就上到嚟同三隻豬仔剪毛喇! 為免大家有誤會, 我準備咗豬仔之前剪咗毛嘅相比佢睇睇, 等佢大概知道我嘅要求, 因為剪太短我真係接受唔到!

C哥哥好好人, 原來佢係導師級嘅寵物美容師, 已有唔少學生架喇! 咁我又放心咗D啦, 起碼唔會離晒譜嘛! 我同佢介紹下幾隻豬仔嘅性格, 等佢容易D掌握. 

豆B最隨和啦, 應該比較容易控制; 咁C哥哥話就由最好相與嘅開始啦, 就豆B排第一!
點知呢隻豬係最無耐性嘅, 乖咗一陣就開始作反, 成日週身郁, 原來佢無蝦Y姐姐, 佢根本就唔可以定落黎! 不過都係C哥哥好耐性啦, 最後順利完成!

豆b毛毛整齊晒, 好靚女!

跟住就到波波喇, 呢隻仔就好細膽嘅, 見到陌生人好緊張, 不過哥哥同佢傾咗一陣, 剪嘅時候就問題唔大喇; 不過佢就唔肯比人摸個頭嘅, 咁就麻煩少少, 好彩哥哥都好有耐性, 慢慢嚟, 難度有D, 但最後都成功剪好!

波波都靚仔晒!

到咗最後, 就係最難攪嘅達達喇, 我再三請哥哥要小心, 因為一摸佢就會掙扎, 兼大聲尖叫架!

果然抱佢入去都未開始, 佢就發晒癲咁又跳又叫, 好彩大家都有心理準備,  而C哥哥都有佢一套方法; 達達最後都算合作, 咁哥哥就順利過關!

睇落總係唔習慣, 有D似隻貓頭鷹

下次都係唔好修呢度喇!

哥哥話做一個寵物美容師要有'耐心, 細心同愛心' 真係缺一不可, 任憑你手藝幾好, 無愛心話狗狗唔合作就打, 咁就唔會係一個成功嘅寵物美容師啦, 佢仲教咗我一D要點去幫達達, 原來寵物行為同心理佢都有研究嘅, 佢話有埋呢方面嘅知識對佢嘅工作係有幫助架!

C哥哥真係一個敬業樂業嘅好人, 又有齊晒"三心", 哈哈! 唔知有無兩意呢?
我好滿意今次整個剪毛過程, 但佢仲話應該下次會仲好D喎! 對自己咁有要求, 佢真係當得上一個成功嘅寵物美容師!!
多謝晒C哥哥咁貼心為我三隻豬仔服務!
亦多謝朋友嘅好介紹!!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！