波波又甲低

波波大腿兩側皮膚變黑！

望見達達出番晒豐厚嘅毛毛, 真係好開心! 近來天氣真係太熱喇, 我都唔敢同佢哋出去, 即使喺傍晚時候, 行吓落平臺都汗流浹背, 佢哋一身厚厚嘅披毛, 一定好難散熱! 除咗同佢哋行下冷氣商場, 都係留喺屋企, 啃下鹿筋算喇; 而我呢, 就睇吓有乜新菜式可以煮比佢地食啦!

日子可以好簡單, 啃吓鹿筋都好滿足

不過有時都會為左搶鹿根打交架!

達達變番毛毛球喇!

要求過一D平凡嘅日子原來都真係唔容易, 怪不得早有名句- "平淡是福",  我發覺波波嘅毛毛開始有D乾旱, 心裏面都有D擔心, 但除此之外唔見有其他問題, 我都唔想小題大做, 好似成日疑神疑鬼, 都係觀察吓先啦!
不過有同狗友討論, 佢介紹咗一隻魚油丸比我, 但坊間寵物店並無出售, 佢喺獸醫診所度配嘅!

我上網睇過呢隻魚油, 係加咗zinc同 garlic, 都係對皮膚有幫助嘅, 我幾隻狗狗皮膚都偏乾, 睇嚟都適合, 不過我睇開嘅獸醫無呢隻魚油, 我又唔會為咗咁轉獸醫, 所以只好上網訂購, 由美國寄番嚟啦!

波波身體唔見有太大變化, 胃口, 大, 小便都正常, 我希望食咗呢隻魚油對佢有幫助啦!

唔知係咪上天要考驗我嘅能耐, 我發現波波兩隻大腿內側D皮膚變黑咗, 我越想越擔心, 上網搵資料越多就越驚, 尤其波波呢個仔自細都多事, 我都唔想再自己嚇自己, 都係帶佢去見吓獸醫安樂D!
 

H 醫生都習慣咗我呢個緊張大師, 見到我都笑問又要驗血, 唉! 你估我想架咩, 睇見都不知幾心痛啦! 

我今次除咗同波波驗甲狀腺外, 再同佢做埋個全血檢查!

報告出嚟係一則以喜, 一則以憂啦!

呢個仔真係多事架, 細細個就肝酵素高, 前年又驗到bun高, 跟住又要驗埋尿睇下係咪腎有事, 好彩有驚無險, 醫生話要調較過D飲食就OK啦! 

果時個個都推崇無穀物糧, 我咪比佢食囉, 點知佢可能運動量唔大, 消耗唔到咁高protein吧!

今次佢嘅全血報告就好靚喇, 可以話係佢出生以來最靚嘅一次! 不過, 另一個結果就係, 佢都係甲狀腺素偏低!

佢開始咗食藥喇, 同達達真係同命鴛鴦!
還好我咁快同佢搵出原因, 因為甲狀腺素低, 會拖慢整個身體嘅新陳代謝, 心臟效率減少, 對心臟好大傷害架! 
醫生話呢個係容易控制嘅病, 隻藥係安全嘅, 唔會傷肝腎, 只要定期驗血, 調較到正確嘅藥份, 咁就唔駛太擔心喇!

養隻狗狗, 都真係唔簡單! 稍為大意, 都可能害苦佢啊!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！