寵物補充品

幾隻豬仔都要食補充品調理吓身體喇

早幾日同朋友A講起狗狗嘅補充品問題, 我哋都係一D比較緊張嘅人, 好多時都怕好心做壞事, 一心一意想比佢哋食D補充品, 可以瀰補食物吸收嘅不足, 但又怕某方面有增強作用，　而相對地喺另一方面又加重咗負擔.

其實自從懷疑波波因為滴頸藥問題, 引起肝酵素升高, 我已經好怕添加任何食糧以外嘅嘢比佢哋; 無論係維他命類抑或係外用防虱類, 我都敬而遠之!
原本想比佢哋一D保護, 但到頭來反而害咗佢哋, 咁又何苦來呢? 不過我就一向有加添魚油比佢哋嘅!

直至到達達身體出事, 除咗藥物治療外, 我再認真咁考慮添加一D補充品, 不過我都好小心選擇, 盡量餵一D天然材料嘅制成品, 希望可以安全咁幫到忙.
其實一隻好嘅補給品, 相信係有佢一定嘅價值, 只係我哋有時真係好難分辨"乜嘢係好"! 係達達病中, 我有比佢添加下面幾種補充品!

1. 台灣"愛倍多petmune"

- 佢主要成份係複方菇蕈多醣體(靈芝、香菇、桑黃、雲芝、褶裂菌、舞茸、巴西蘑菇)、 葡萄糖胺、辣木、嗜酸乳酸桿菌、乳酸鏈球菌、雙叉乳酸桿菌、LP益生菌、微量元素(鍺、銅、鋅、硒及鐵離子)等。除此也含有特殊的納豆菌及納豆激脢, 有助調節腸道免疫系統, 改善排便, 去除自由基,協助食物的營養成分之消化及利用, 有效抵禦腸胃中多種酵素的殺滅作用, 亦添加獨家骨骼強化配方, 能強化骨骼及防止關節病變、 補充關節滑液、促進膠原蛋白的生成、並且有效刺激及保護並修復軟骨.


本來呢隻都係一個唔錯嘅選擇, 不過後來聽聞制成品放得越耐, 功效會越消減, 咁又有好大問題！產品從出廠到我哋手上, 效力一直減退中, 咁我哋嘅寶貝究竟吸收到幾多?
唔知佢哋內部有乜嘢問題, 佢哋已經停產； 不過即使佢哋仍繼續生產, 但未解決到呢個問題, 我都唔會再用.

2. 美國"The Green Hope Farm Flower Essences"
- 呢隻花藥我用嚟幫助達達舒緩壓力, 佢情緒係有D問題, 成日驚驚青青咁, 又唔係好開心! 用咗之後, 係有D幫助嘅!
喺外國，早已經有Holistic Dog Care 嘅概念，狗狗要生活得好，身體要健康外, 心靈亦要健康。
Holistic Dog Care包括順勢療法嘅草本藥物、香草、營養補給品及花藥等。
Holistic整全, 即是身、心靈平衡而達到健康, 道理就如中醫嘅「固本培元」。 
Holistic Dog Care 就是比狗狗生活回歸自然，當中包括健康營養嘅飲食, 以無副作用嘅自然療法治病, 來提升佢哋嘅自療能力。
其實Holistic Dog Care早已係美國存在, 只不過從來無一個完整嘅系統及研究。

3. 美國The DERMagic Products
- 呢隻係外用沖涼用品, 全天然植物做原料; 佢哋嘅官方網站都post咗好多狗狗用完呢隻產品後, 皮膚毛髮都有明顯幫助.姑勿論呢隻產品係咪療效咁大, 但正如佢哋所講, 佢哋絕唔同意不斷用類固醇去料理狗狗皮膚問題, 所以我覺得狗狗有脫毛不防一試!
https://www.dermagic.com/Black-Skin-Disease_ep_69-1.html

4. 美國"Dermapet Eicosacaps"
- 呢隻魚油丸係網友K所介紹, 佢嘅狗狗之前有毛髮生長障礙, 皮毛乾旱及皮削問題, 徵求獸醫意見後, 建議服用呢隻魚油丸;而佢嘅狗狗服用後, 有好大改進．  我幾隻狗狗都有相同問題, 所以我就開始轉用呢隻品牌. 其實一般魚油大都含有Omega 3&6脂肪酸, 但呢隻就添加咗鋅, 維他命E, 維他命C等, 對皮毛幫助更大!

5.美國" The Gift For Life 大長生"
- 自從”愛倍多”停止發售後, 我開始搵另一隻補充品作代替, 有網友介紹”大長生” 呢隻產品, 其實我唔係太瞭解, 佢嘅成份到底係乜嘢嚟, 說明書話主要成份係 Oligopeptides寡肽 - 天然蛋白質複合胺基酸, Ip6 (Inositol hexaphosphate)  - 肌醇六磷酸;　提練自全穀物．其不含防腐劑，化學成份，有害物質，亦不含激素或荷爾蒙．但佢又唔係維他命，礦物質，中草藥；不過身體會當作體內天然元素咁吸收．

 
睇完晒佢嘅說明，我一樣唔係好明佢到底係乜嘢嚟！不過網友話有朋友嘅貓貓食過，精神同毛髮都好咗! 而我幾隻豬仔以後都要長期服藥，我希望搵到一Ｄ外來嘅幫助，等佢哋唔會病情加深！

由於我對呢隻產品唔瞭解，所以決定服用三個月左右就會停服！有益嘅三個月都有一定嘅幫助，有害嘅亦唔會禍害落去！其實都係要久不久同佢哋轉糧嘅原理一樣！　

補充品呢樣嘢其實都好具爭議性，好睇個人見解; 不過健康嘅，年紀細嘅狗狗，我都認為加添魚油就好足夠；年紀大咗，有病嘅就要睇個人嘅選擇啦，畢竟我哋都係本住一個原則，想狗狗身體健康嗟！

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！

聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。  望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！