一個小意外

如果佢哋吞咗??!!

我每次請工人姐姐, 都習慣比佢一份指引, 等佢有個方向, 知道我大概嘅要求, 目的係唔想大家有不必要嘅誤會, 佢亦唔駛無所適從!
因為狗狗對我哋極其重要, 所以指引嘅其中一段, 我非常清楚咁指出, 要點樣對待我嘅豬仔!

自己好清楚知道 ,呢D咁迷你嘅松松, 真係要好小心睇住, 就算從不高處跌下, 都有斷骨嘅可能!

但姐姐就可能未有咁嘅經驗, 去同咁小型嘅狗狗生活在同一屋簷下!

其實照顧狗狗我從來都不假手於人, 無論沖涼, 梳毛, 日常大小清潔事項, 我都係自己一手包辦, 煮狗食, 餵藥, 加補充劑呢D咁重要嘅野, 就更加只信自己, 至於帶狗狗去街街, 亦唔會放心交托比任何人! 所以, 工人姐姐基本上係唔需要照顧我嘅狗狗!

我嘅指引只係講比佢知, 我哋對待狗狗猶如家人, 佢哋如同我嘅仔女, 如果佢可以好似我哋咁去愛狗狗, 我會好開心! 不過, 佢唔可以隨便比任何食物, 或小食比狗狗; 而有一個重點一定要緊記, 任何時間跌咗嘢落地, 一定要即刻拾起, 因為即使好微細嘅物件, 都可能做成不可瀰補嘅遺憾! 小則踏傷佢地嘅腳仔, 嚴重嘅如果吞下, 難以估計禍害幾深!
仲有嘅就係, 唔可以抱起佢哋! 唔識抱狗狗嘅人, 係會有可能跌親佢哋, 都聽過唔少呢D意外, 佢哋唔係公仔, 係會郁嘅小朋友, 唔小心跌親好容易造成骨折, 所以要嚴格執行!

今日, 發生咗一件小意外, 小插曲, 但真係嚇壞我!

自問養咗狗狗以來, 我非常小心, 因為深知一個不留神, 可釀成致命嘅意外!
長久以來, 都習慣時刻檢視地上, 去確定無跌下任何可傷害到狗狗嘅物件!

今日, 工人姐姐將一粒萬用膠放咗喺架上, 但最後竟遍尋不獲, 我搵咗好耐, 開大冷氣都成身濕晒, 當然唔係怕失去果粒膠, 我係怕放唔好跌咗落地, 班豬仔會吞咗!!!

真係既焦急又擔心! 腦裏面諗佢地會唔會真係吞左? 咁有無可能痾番出黎? 會唔會黐住條腸? 會唔會有毒?
我叫姐姐拾咗便便唔好立刻沖廁, 我要逐一檢查!

可能有人覺得好嘔心, 但我真係無辦法! 一日搵唔到究竟, 我好難放心!

但係, 始終都係無收獲! 姐姐見到我又嬲又擔心, 佢好驚!

最後, 我頹然坐咗入房; 無幾耐, 佢拍門!
佢手上拎住果粒膠, 話比我聽, 係從吸塵機度 ,倒出垃圾果時見到嘅! 佢話呢個係佢好大教訓, 見到我連每張椅都反轉去檢查椅腳, 就知我幾驚!

本來, 我真係好嬲, 嬲到想即刻炒咗佢,咁唔小心驚佢害死我D豬仔, 不過, 事件告一段落, 我就無再同佢計較啦!
希望佢真係吸取到教訓, 以後做嘢會加倍小心啦!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！