剪毛日前夕

D毛毛真係又長又亂喇!

明日真係一個狗狗嘅大日子, 哈哈, 我都頗緊張架!

先要多謝朋友介紹咗C哥哥比我認識, 咁我就第一次嘗試吓請人上門, 同佢哋美容剪毛毛.

我嘅狗狗一向都係請Y姐姐幫佢哋剪毛嘅, 由我養佢哋以來都係, 只有一次搵唔到Y姐姐, 波波試過比其他人剪; 但結果我都幾後悔, 唔係話剪得唔靚, 而係呢隻仔好驚青, 見到陌生人成日都想喺檯跳落地走路, 結果要搵人捉實佢, 唉! 咁我就好心痛啦, 剪毛都攪成咁!

以前住港島, 行過去Y姐姐間鋪都唔駛10分鐘, 真係好方便!

但自從搬咗過九龍後, 就好懶過香港喇! 而且帶住3隻豬仔出去都幾辛苦, 我怕我控制唔到佢哋! 我希望今次順利啦, 唔係嘅話, 再辛苦都係要返去搵Y姐姐喇!

不過我真係有D擔心嘅, 達達咁神經質, 比個陌生嘅哥哥幫佢, 佢會唔會好抗拒又尖叫呢? 如果佢好唔合作咁點算呢? 我又唔想嚇親佢!
波波又會點呢? 今次佢又會唔會想跳走? 會唔會驚到震晒呢?
豆B我就無擔心, 因為佢一向都無乜所謂, 見慣世面嘛!

只係同3隻豬仔美容, 咁簡單嘅事, 我都要擔心一大餐, 我都覺得自己過份咗, 但性格真係無得改變!

好似以前我阿女細個, 我去參加家長會, 我又係好緊張, 好似要有份講詞喺個腦咁, 一早諗定要講乜嘢, 我阿女成日笑我, 話好多嘢係無得準備嘛, 要到時見招拆招!

我夠知啦, 所以世界上先會有話"一樣米養百樣人, 十人生九品"呢D名句囉 !

仲有"江山易改, 品性難移"呀!


 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！