達達甲低

見到佢Ｄ毛變到一注注咁，就開始心慌

2010年10月, 我發覺達達身體出咗問題! 佢嘅毛毛變得好旱, 毛量亦開始變薄!

幾乎所有人都覺得我過份緊張, 佢睇嚟一D問題都無!  但有邊個比我更清楚? 我每日同佢梳毛, 日日都用手撫摸過佢, 佢有乜嘢變化, 我點會唔知!

腦中即時諗起叻叻嘅情形, 如果, 當日自己有揳而不捨咁去尋求方法, 而唔係只聽獸醫嘅一面之詞, 或者叻叻唔會延誤咗個病情, 引發後來骨牌倒下效應! 
我一直都好後悔, 好自責當日唔夠堅持.  所謂'一朝被蛇咬, 十年怕草繩' , 可能有人會覺得我杯弓蛇影, 但係,  我寧願做多咗, 都唔要再錯失任何可以幫到佢嘅黃金時間!

當日帶去見醫生時嘅達達, 又難怪醫生都唔信佢有掉毛情況!

所以, 我決定帶佢見獸醫!  一如所料, 獸醫唔覺佢有問題, 當然佢睇起嚟仲係好厚毛, 真係好難令人聯想到有我講得咁差,  但我曾親身經歷過叻叻可以從厚厚嘅毛, 至掉到差不多全禿, 今次, 我堅持驗血!

驗血結果顯示達達真係甲狀腺素偏低, 但醫生好詳細解釋比我聽,甲狀腺素分泌係好似一條 curve line咁, 係有高, 低點；可能佢剛處於低點, 遲吓會升番上去, 叫我先觀察, 目前唔需要服藥; 一個月後再做多次驗血, 先決定治療方案．

我同意, 好感謝醫生詳細分析; 於是, 同達達先回家, 希望佢真係剛處於低點吧！

但情況並唔係我希望咁樣, 只係過咗三星期, 達達嘅毛質已經好差, 我唯有call醫生問佢嘅意見, 佢同意開始服藥, 叫我先取三星期藥, 食完再驗血！　

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！